ЖЕРГЕ-ТАЛ КӨРҮСТӨНҮ
ЖЕРГЕ-ТАЛ КӨРҮСТӨНҮ – I–VIII кылымдарга таандык археологиялык эстелик. Чаткал өрөөнүндөгү Жерге-Тал капчыгайынын батышында. 75 дөбө мүрзөдөн турат. Адамдын сөөгү катакомба, жапма көрлөрдө жанаа таш табыттарда (бир, экиден жана чогуу) коюлган мүрзөлөр кездешет. Карапа идиштер (айрымдарынан 6–7 кумура), темир тогоо, темир бычактар, коло күзгү, асем буюмдар табылган. 1950-жылы археолог А. Кибиров, 1955-жылы Ю. А. Заднепровский, 1981-жылы Ы. Кожомбердиев изилдеген.