ЖЕТИ-ӨГҮЗ КУРОРТУ
ЖЕТИ-ӨГҮЗ КУРОРТУ – климаттык-бальнеологиялык курорт. Каракол шаарынан 28 км түштүк-батыш жана Ысык-Көлдөн 30 км түштүк тарапта, Тескей Ала-Тоонун түндүк капталындагы Жети-Өгүз капчыгайынын карагай токойлуу кооз жеринде, деңиз деңгээлинен 2200–2400 м бийикте жайгашкан.
Жайы мелүүн, июль айынын орточо температурасы 15°С, кышы да мелүүн, кар көп түшөт, январь айынын орточо температурасы –9°С. Жылдын орточо жаан-чачыны 500 мм чамасында, чөйрөнүн орточо нымдуулугу 65%. Мындагы минералдуу ысык (41°С) булактардын дарылык касиеттери жергиликтүү элге байыртан белгилүү болгон (кара, Жети-Өгүз минералдуу суусу). 1857-жылы П. П. Семёнов-Тянь- Шанский булактарды сыпаттап жазган. 1910-жылы атайы үй курулуп, жыгач ванналар пайдаланылган. 1931-жылдан курорт куруу колго алынып, 1940-жылы эки имараты пайдаланылууга берилген. Дарылоо радондуу, хлорид натрий-кальцийлүү жана азоттуу ысык булак сууларынын ванна жана бассейндерине түшүрүү, ошондой эле тоо климатынын таасирин тийгизүү менен жүргүзүлөт. Ванна, душ, денени чайкоо жана ичүү аркылуу муун, ичеги-карын, боор, нерв жана дем алуу системаларынын, гинекологиялык жана кээ бир тери ооруларын дарылайт.