ЖУМАБАЕВ

ЖУМАБАЕВ Эсенгул (9. 7. 1941-жылы туулган, Чүй облусу‚ Кемин району‚ Шабдан айылы) – композитор, дирижёр, сүрөтчү, Кыргыз CCР эл артисти (1987)‚ Кыргыз Республикасынын Ток­тогул атындагы мамлекеттик сыйлыктын лауреаты(2002).Кыргыз CCРинин искусствого эмгек

сиңирген ишмери (1974). Фрун­зедеги М. Күрөңкөев атындагы музыкалык-хореографиялык окуу жайын (1961)‚ Б. Бейшеналиева атындагы Кыргыз мамлекеттик искусство институтун (1972) бүтүр­гөн. Т. Cатылганов атындагы Кыр­гыз улуттук филармония­сынын К. Орозов атындагы эл ас­паптар оркестринде кыякчы (1958–1964)‚ дирижёр (1964–1972)‚ башкы дирижёр жана көркөм жетекчи (1978–1986)‚ филармониянын көркөм жетекчиси (1989–1993)‚ 1993-жылдан «Камбаркан» этнографиялык-фольклордук тобунун көр­көм жетекчиси. Э. Жумабаев 100дөн ашуун ыр-күүлөрдү оркестр үчүн иштеп чыккан‚ анын ичинен К. Орозовдун «Насыйкат»‚ Ш. Шеркуловдун «Жүрөк толкуйт»‚ «Марш камбаркан»‚ Ы. Тумановдун «Паровоз» жана башкалар‚ элдик ыр «Cарой»‚ М. Баетовдун «Кыздар ай!»‚ А. Огомбаевдин «Жаштарга» жана башкалар бар. Үч бөлүмдүү эпикалык симфониянын‚ «Кыргыз­стан»‚ «Карагул ботом» симфониялык поэмаларынын‚ спектаклдер үчүн музыканын‚ аспаптык чыгар­малардын автору. «Камбаркан» ансамбли менен чет өлкөлөрдө гастролдо болгон. Cүрөтчү ката­ры чыгармаларынын автордук көргөзмөсүн өткөргөн (2003–2004).