ЖУМАДЫЛОВ
ЖУМАДЫЛОВ Советбек (5. 12. 1932-жылы туулган, Ысык-Көл облусу, Ак-Суу району, Тепке кыштагы – 3. 24. 2000-жыл, Бишкек шаары) – драма артисти, киноактёр, Кыргыз ССР эл артисти (1977). Ташкенттеги А. Н. Островский атындагы театр-көркөм сүрөт институтунун актёрдук факультетин бүтүргөндөн (1953) Кыргыз мамлекеттик академиялык драма театрында иштеген. С. Жумадылов каармандардын ички сырын, социалдык маңызын ачып, жекече мүнөз таба билген.
Ар кыл тематикадагы образдарды аткарып, алардагы таасирдүү тереңдиктерди таап, жөнөкөй, жеткиликтүү берген. Аткарган негизги ролдору: Ашырбай, Солтобай, Мухтар, Омор (Т. Абдумомунов, «Ашырбай», «Тар капчыгай», «Абийир кечирбейт»), Мырзакул, Мамбет, Эдигей, Танабай (Ч. Айтматов, «Бетме-бет», «Фудзиямадагы кадыр түн», «Кылым карытар бир күн», «Танабай Бакасов»), Кызыл чок, Маке чал (Б. Жакиев, «Алтын аяк»), Боромбай (А. Токомбаев, «Өлбөстүн үрөнү»), Тазабеков (Э. Турсунов, «Замандаш»), Дайыр Мусаевич (М. Байжиев, «Ар бир үйдө майрам»), Омар Хайям (К. Мамбетакунов, «Омар Хайямдын махабаты»), Ажы (Н. Байтемиров, «Уркуя»), Семетей, Коңурбай (Ж. Садыков, «Сейтек», «Айкөл Манас»); орус жана дүйнөлүк классиктерден: Лопахин, Войницкий (А. Чехов, «Алчалуу бак», «Ваня таяке»),
Вронский (Л. Толстой, «Анна Каренина»), Куудул, Ричард, Отелло (У. Шекспир, «Король Лир», «Ричард III», «Отелло»), Доктор (Н. Хикмет, «Унутулган адам»), Эзоп (Г. Фигейредо, «Эзоп») жана башкалар. Жумабеков кинодо да көптөгөн ролдорду аткарган: Шараф (режиссёру А. Бергункер, «Жоро»), Болотбек (М. Убукеев, «Тайгак кечүү»), Токтогул (Б. Каипов, «Алымкан»), Жарасбай (Б. Шамшиев, «Караш-караш окуясы»), Баяке (М. Убукеев, «Ак Мөөр»), Байзак (Б. Шамшиев, «Касиеттүү Ысык-Көл») жана башкалар. Медалдар мене сыйланган.