ЖУМАЛИЕВ
ЖУМАЛИЕВ Cардарбек (5. 2. 1941-жылы туулган‚ Чүй облусу‚ Кант (азыркы Ысык-Ата) району‚ Жар-Башы айылы) – дирижёр, обончу, Кыргыз Республикасынын эл артисти (1999). Фрунзедеги М. Күрөңкөев атындагы музыкалык-хореографиялык окуу жайынын алдындагы музыкалык мектепти (1958), М. Күрөңкөев атындагы музыкалык-хореографиялык окуу жайын (1962)‚ Б. Бейшеналиева атындагы Кыргыз мамлекеттик искусство институтун (1967) бүтүргөн.
Кыргыз филармониясынын алдындагы К. Орозов атындагы Эл аспаптар оркестринде (1958), Кыргыз эстрада ансамблинде (1968) комузчу‚ Республикалык эл чыгармачылык үйүндө музыкалык редактор (1972–1975)‚ 1977-жылдан К. Орозов атындагы Эл аспаптар оркестринде дирижёр. Оркестр менен Сирия, Польша, Моңголия, Кытай, Корея, Түркия, Франция, Япония жана башка мамлекеттерде гастролдо болгон. С. Жумалиевдин эл арасына кеңири тараган 100дөн ашуун обону («Дзержинский бульварым»‚ «Кыргыз жери кымбатым»‚ «Ысык-Ата арашан»‚ «Толкундар»‚ «Таң сыры»‚ «Cен менин жазылбаган ырларымсың» жана башкалар) бар. Ал обончулардын ондогон обондорун оркестр үчүн иштеп чыккан. Фортепьяно үчүн пьесалардын‚ романстардын автору. Бүткүл дүйнөлүк интеллектуалдык менчик уюмунун алтын медалынын ээси (2007). Медалдар менен сыйланган.