ЖАЛГАН ДМИТРИЙ I
ЖАЛГАН ДМИ́ТРИЙ I [туулган жылы белгисиз – 17 (27). 5.1606] – өзүн орус падышасы Иван IVнүн баласы Дмитриймин деп көрсөткөн саясий куйту; ал кечил Григорий Отрепьев деген маалыматтар бар. Жалган Дмитрий Iнин орус тагына умтулушун поляк литва төбөлдөрү ж-а Северск жери м-н Смоленскини алууну көксөгөн Польша королу Сигизмунд III колдогон. Жалган Дмитрий I католик динин жашыруун кабыл алып, Ватиканга орус чиркөөсүн баш ийдирүүнү убада кылган. Жалган Дмитрий I дыйкандар м-н казак-орустардын антифеодалдык көтөрүлүшүнөн ж-а боярлардын падыша Б. Ф. Годуновдун жүргүзгөн саясатына нааразылыгынан пайдаланып, 1604-жылы күзүндө поляк-казак орус отряддары м-н Россияга кол салып, 1605-жылы 20-июнда Москваны ээлеген. Жалган Дмитрий Iнин саясатынын элге каршы багыты нааразылык туудуруп, ал элдик көтөрүлүштүн убагында өлтүрүлгөн.