ЖАНАРТОО-ЧӨКМӨ КЕНДЕР
ЖАНАРТОО-ЧӨКМӨ КЕНДЕР – деңиз м-н океан түбүндө атылган жанартоолордон чыккан минералдык заттардын жыйылып, деңиз чөкмөсү м-н бирге пайда болгон кендер. Жанартоо-чөкмө кендерге темир, марганец ж-а колчедан кенташтары, айрым илимпоздордун изилдөөлөрү боюнча боксит м-н фосфориттердин кендери кирет. Алар лава, күл (чаң, кум) ж-а кремнийлүү тоотектердин деңиз чөкмөлөрү м-н аралашып жаткан калың катмарларында кабат же желвак түрүндө кезигет. Бардык геологиялык мезгилдердеги тоотектерде жолугат. Кыргызстандагы Жетим темир кенташ бассейни, Арчалы марганец кени, Жакболот марганец кени ж. б. жанартоо-чөкмө кендерге кирет.