ЙОГА ГИМНАСТИКАСЫ
ЙО́ГА ГИМНАСТИКАСЫ – Индиядагы байыркы ж-а о. кылымдарда түзүлгөн диний-филос. окуу системасынын атайын гимнастикалык көнүгүүлөрдү камтыган түрү. Мында адам ар түрдүү позалардын, гимнастикалык көнүгүүлөрдүн негизинде өзүнүн техникасын ж-а физиол. процесстерин толугу м-н башкарууга умтулат. Йогалар өздөрүнүн дем алуу системасын, жүрөгүнүн иштешин башкара алат. «Йога» деген сөз жалдырап тиктөө, терең ойлонуу дегенди түшүндүрөт. Й. г. беш бөлүктөн турат: филос.; дем алуунун ыкмаларын колдонуу; тазалыкты сактоо ж-а тамак ичпей, ички организмди тазалоо; отуруп терең ойлонуп, бир жерди тиктөө (медиатация); дененин кыймылы м-н аткарылган гимнастикалык көнүгүүлөр ж-а позалар. Дене тарбияга тиешелүү бөлүгү хатха-йога деп аталат, андан ар түрдүү позалар (лотос, шамчырак, маймыл, арстан ж. у. с.), о. эле көнүгүүлөр аркылуу денени чыңдап, кишинин дене-күч сапаттарын (күчтүүлүктү, шамдагайлыкты) өнүктүрүүгө болот. Йога м-н машыккандар ооруга көп чалдыгышпайт, тез сакайышат ж-а көп жашайт.