ДОСТУК МОНУМЕНТИ
ДОСТУК МОНУМЕНТИ – кыргыз, орус элдеринин достугунун символу катары тургузулган эстелик. Фрунзедеги борбордук аянтта ачылган (1974-жыл, 18-октябрь). Авторлору: айкелчилер Т. Садыков, З. Хабибуллин, монументалист сүрөтчү С. Бакашев, архитектору А. Нежурин. Достук монументи кыргыз элинин өз ыктыяры менен Россиянын курамына кошулушунун 100 жылдык юбилейинин урматына тургузулган. Бийиктиги 30 м эки ак канат сымал мрамор-пилонду жезден чегилген рельеф курчап турат. Шакекчедеги тулкулардын композициясынын борборундагы эки эне орус жана кыргыз калкынын достугун мүнөздөйт.
