ИЙИК
ИЙИК – 1) жүн, кебез, жибек, ар кандай буладан жип ийрүүгө ылайыкталган курал. Сабы кургатылган табылгы же талдан бир жагы ичкерээк жасалып, узундугу 30–35 см, жоондугу 7–10 мм болот. Ийиктин башы таштан, коргошундан жалпак же тегерек жасалат да, ортосу көзөлүп, саптын жоонурак учуна бекем кийгизилет.
Саптын жогору учу (буйласы) көзөлүп, ага ичке чий өткөрүлөт . Жипти керегине ылайыктап ичке, жоон кылып ийришкен. Ийрилген жип ийик баштын астына түрүлө берип, муштумдай болгондо, саптын ичке жагынан чыгарылат. Ал бир баш алмай жип деп аталган; 2) текстиль өнөр жайында жипти ийрүүчү, челдөөчү, чыйратуучу машиналардын жиптерди түрмөккө, чыгырыкка түрүүгө ылайыкталган негизги тетиги. Ийиктүү машина XVIII кылымдын 2-жарымында колдонула баштаган. Табигый (пахта, жүн, зыгыр жана башкалар) жана химиялык булалар үчүн колдонулуучу ийиктер болот. Өндүрүштө килем, аркан, көтөрмө жана башкаларды жасоо үчүн жоон жипти экиден чыйратуучу ийик колдонулат. Бул ийик жөнөкөйлөрүнө караганда эки эсе өндүрүмдүү, бирок түзүлүшү татаал.