ИЙРЕК
ИЙРЕК – чылгый жана ашатылган теринин этин, майын, челин тазалоо үчүн колдонулган аспап. Ал жыгач жана темирден жасалган. Жыгач ийрек катуу жыгачтан (узундугу 50–60 см) билектен жоон, эки учу кармоого ылайыкталып, орто жери мизделип, теринин эт, майын сыдырыш үчүн быдырланып жасалган. Темир ийрек да иштөөгө жеңил болгондой, сабы жумуру жыгачтан жасалып, мизи быдырланган. Ийрек терини эт-челинен ажыратып, өңдөөгө даярдаган.