ЖЫРГАЛАҢ КУРОРТУ
ЖЫРГАЛАҢ КУРОРТУ – климаттык-бальнеологиялык жана баткак менен дарылоочу курорт. Ысык-Көл облусунун Түп районунда, Каракол шаарынан 10 км түндүк тарапта. Ысык-Көлдөн 10 км, Жыргалаң суусунун боюнда, деңиз деңгээлинен 1624 м бийикте жайгашкан. 1965-жылы ишке киргизилген. Жыргалаң курорту Ысык- Көлдүн курорттук аймагына кирет. Климаты континенттик: кышы жумшак, январь айынан орточо температурасы – 5°С; жайы жылуу, июль айынын орточо температурасы 18°С. Жылына 400 ммге жакын жаан-чачын түшөт, чөйрөнүн орточо нымдуулугу 60%. Күн радиациясы өтө жогору. Жыргалаң курортунда дарылоо негизинен минералдуу ысык (43°С) суу ваннасы, дары баткагы менен жүргүзүлөт (карагыла, Жыргалаң минералдуу суусу, Жыргалаң баткак кени). Муундун жана нерв системасынын ооруларын дарылайт.