ЖЫГАЧ КОНСТРУКЦИЯЛАР
ЖЫГАЧ КОНСТРУКЦИЯЛАР – толук же көпчүлүк бөлүгү жыгачтан жасалган курулуш түзүлмөлөрү. Жыгач конструкциялары тактай тилүүчү, жыгач иштетүүчү ишканада, көпүрөдө, мунарада, айыл чарба курулушунда колдонулат. Курулушта – алкак, ферма, устун, кадоо, түркүк, таяныч, төшөлгө, калкан, кашек жана башка катары пайдаланылат. Ири жыгач конструкциялары эки-үч устундан туруп, желим же жыгач чегелер менен бириктирилет. Жыгач чегелүү устундардын узундугу 6 мден ашпайт, себеби аларды аштап узартууга болбойт.
Желимделген устундун узундугу 12–15 мге жетет. Өнөр жай имаратындагы аралыкты жабуу үчүн өтмө конструкциялар (фермалар) пайдаланылат. Мейкиндик жыгач конструкцияларга торчолуу , кабыктуу конструкциялардагы мунаралар жана мачталар кирет. Кабык түрүндөгү конструкциялар бир нече катмардуу болуп, тактайдан даярдалат. Калкан жыгач конструкциялар үйдүн чатырын жабууда колдонулат.