ЖЭЭК (жиптен ийрилип жасалган тасмача)
ЖЭЭК – оң, сол ийрилип чыйратылган эки же үч бөлөк жиптен жасалган жалпак же жумуру тасмача. Жээктелүүчү буюмга жараша ар кандай жоондукта, ар башка (бир же бир нече) түстө болуп, жоон ийрилген жүн жиптерден гана эмес, ичке жибек же кебез жиптерден да жасалат. Жээк шырдак, аяк кап, табак кап, секиче, эшик тыш, үзүк, туурдук, түндүк жабуу сыяктуу кийиз буюмдардын жээгине же оймо тигиштеринин үстүнө бастырылат. Жээк жөрмөп тигилген тигишти жашыруу менен жасалган буюмга көрк берип, анын чоюлбай жана кебинен бузулбай турушун камсыз кылат. Аны менен эркек көйнөктөрдүн жака-жеңи, белдемчинин чети, салаа тигиштери, мээлей тигиштери, балдар кийимдеринин кооздолуучу жерлери жээктелет. Айрым жерде кийимдердин, буюмдардын көбөөсү жээк же кыйык деп аталат.