БУТИЛ СПИРТТЕРИ

БУТИ́Л СПИРТТЕРИ – спиртке мүнөздүү жыты бар түссүз суюктук. Анын 4 изомери белгилүү: бутанол-1 СН₃(СН₂)₃ОН, кайноо t 117,4°С. Өнөр жайда глицерин, глюкоза, крахмал ж. б. углеводдорду ферменттик ачытуу ж-а синтез жолу м-н алынат; бутанол-2 СН₃СН₂СНОНСН₃, кайноо t 100°С, -бутиленди гидролиздөөдөн алууга болот; изобутил спирти (СН₃)₂СН–СН₂ОН, кайноо t 107,5°С, катализатордун катышуусунда СО м-н Н₂нин аралашмасынан синтезделет; триметилкарбинол (СН₃)₃СОН, кайноо t 82,9°С, изобутиленди гидратациялоодон алынат. Алар – хим. касиеттери б-ча кадимки алифаттык спирттер. Үчүнчүлүк бутил спиртинен башкалары окистенип, карбонилдүү бирикмелерди пайда кылат. Өндүрүштө мочевина-формальдегид чайыры үчүн модификатор, пластификаторлорду алууда ж-а этил целлюлозаларын өндүрүүдө эриткич катары, татаал эфирлерди, жуугуч заттарды ж. б. синтездөөдө колдонулат.