БОЗЕ–ЭЙНШТЕЙН СТАТИСТИКАСЫ

БО́ЗЕ–ЭЙНШТЕ́ЙН СТАТИСТИКАСЫ – бозон системасына колдонулуучу кванттык эсептөө. Аны 1924-ж. индия окумуштуусу Ш. Бозе сунуш кылып, А. Эйнштейн өнүктүргөн. Квант механикасында бөлүкчөлөрдүн системасынын абалы анын координаталарына ж-а спиндерине карата толкун функциясы аркылуу түшүндүрүлөт. Анда толкун функциясы бирдей бөлүкчөлөрдүн ар кандай түгөйүнүн орун алмашуусуна карата симметриялуу. Мындай толкун функцияларына квант абалын сандарга толтуруу чектелбейт, б. а. бир эле кванттык абалда каалаган сандагы бирдей бөлүкчөлөр болот. Ал өтө суюлтулган газда Больцман статистикасына өтөт.