БАЛЬФУР ДЕКЛАРАЦИЯСЫ
БАЛЬФУР ДЕКЛАРАЦИЯСЫ (1917) Улуу Британиянын тышкы иштер министри Ж. Бальфурдун ысмынан аталган. Анда Улуу Британиянын өкмөтү Палестинада «еврей элинин улуттук очогун» түзүүгө жардам берүүгө даяр экендигин билдирген. Кийин бул декларация Франция жана АКШ тарабынан таанылып, Севр тынчтык келишиминин шарттарына киргизилген. Биринчи дүйнөлүк согуштун жыйынтыгында Палестинаны башкарууга мандат алуу менен Британия Бальфур декларациясын ишке ашырууга жана Палестинага башка өлкөлөрдөн еврей калкынын келүүсүн колдоого аракеттенген. Бул аракет Палестина аймагында Израиль мамлекетинин түзүлүшү (1948) менен аяктады. Бирок бул декларация палестиналык арабдардын нааразылыгын пайда кылып, еврейлер менен арабдардын ортосунда кагылышууларга алып келген жана бүгүнкү күнгө чейин чечилбей келаткан араб-израиль чыр-чатактарына негиз салган.