БЕГОНИЯ

БЕГО́НИЯ (Веgonia) – өсүмдүктөрдүн бегониялар тукумунун уруусу. Жоон тамырлуу, көп жылдык чөп өсүмдүгү, кээси бадал же лиана сымал. Сабагы түз, төшөлүп же жармашып өсөт. Жалбырагы жөнөкөй, кезектешип жайгашкан. Айрым түрүнүн жалбырагы темгилдүү. Гүлү бир жыныстуу, мөмөсү – кутуча, уругу абдан майда. 900дөй түрү белгилүү. Көбүнчө тропик ж-а субтропикте (Австралиядан башка) өсөт. КМШ өлкөлөрүндө гүлү ж-а жалбырагы кооз түрлөрү – рекс, чаар Б-лар ж. б. оранжереяда, үйдө, гүлзарларда, Кырг-нда Креднер, Марта, Бисмарк сорттору өстүрүлөт. Сабак, жалбырак калемчелери ж-а уругунан көбөйтүлөт.