БАТЫШ ЕВРОПАЛЫК СОЮЗ (1955)
БАТЫШ ЕВРОПАЛЫК СОЮ́З (1955) – согуштук-саясий уюм; Париж макулдашууларына ылайык Батыш союзуна (1948, курамына Бельгия, Улуу Британия, Люксембург, Нидерланд жана Франция кирген) Италия жана Германия Федеративдүү Республикасынын кошулуусунун натыйжасында Батыш европалык союзу болуп кайра түзүлгөн. Союзга кирген мамлекеттер эгерде алардын бирине Европада кол салуу коркунучу туулган учурда өз ара жардамдашуу максатын көздөйт. Батыш европалык союздун жетекчи органы – өнөктөш өлкөлөрдүн тышкы иштер министрлеринен турган Совет жана ошол өлкөлөрдүн парламентарийлеринен турган Ассамблея. Совет менен Ассамблеянын чечими сунуш катарында гана болот. Союздун ишмердүүлүгү Түндүк Атлантикалык келишим уюму менен тыгыз байланыштуу.