БАФФИН ДЕӉИЗИ

БА́ФФИН ДЕӉИЗИ – Түндүк Муз океандагы жарым-жартылай туюк деӊиз. Гренландия аралы менен Канадалык Арктика архипелагынын аралыгында. Дейвис кысыгы аркылуу Атлантика океаны менен кошулат. Аянты 530 миӊ км². Эӊ тереӊ жери 2414 м. Суунун температурасы жайында 4–5°Сден 0°Сге чейин, кышында –1°Сден төмөн. Жылдын көп мезгилинде муз каптап жатат, айсберг көп. Туздуулугу 30–34‰. Суткасына эки жолу ташкындайт (4 мге чейин). Балык (треска, сельдь ж. б.) кармалат. Англиялык уюл изилдөөчү У. Баффиндин ысмынан аталган.