БАШКЫ РЕДАКТОР

БАШКЫ РЕДА́КТОР – гезит, журнал ж. б. басма редакцияларында, радио жана телеберүү каналдарында, көп томдуу басылмаларды (мисалы, сөздүк, энциклопедия ж. б.) чыгаруучу мекемелерде адабий-чыгармачылык, өндүрүштүк-уюштуруучулук иштерди башкаруучу жооптуу кызматкер. Башкы редактор басма сөз органы менен басманын бүтүндөй редакциялык саясатын аныктап, алардын күндөлүк чыгармачылык иштерине түздөн-түз жетекчилик жүргүзөт; редакциялык коллегия (гезит, журналда) менен редакциялык кеӊештин (басмада) иштерине багыт берип турат. Башкы редактор редакциянын ишин пландаштырууга, кадрлар саясатына, финансы-чарбалык абалына, басылмалардын белгиленген мөөнөттө чыгуусуна, ага жазылууну уюштурууга жана таркатууга жооп берет.