БРАЗИЛИА
БРАЗИ́ЛИА – Бразилия Федерация Республикасынын борбор шаары. Калкы 2,0 млндон ашык (2020), 1960-жылы 21-апрелге чейин Рио-де-Жанейро шаарынан расмий которулган. Бразилия бөксө тоосунун борбордук бөлүгүндө, деӊиз деӊгээлинен 1000 м бийиктикте жайгашкан, чет жакасы менен Федерация борбордук округун түзөт.
Эл аралык аэропорту, метрополитен (2001), тамак-аш, жеӊил өнөр жайы, университет бар. Шаар борбордун функциясын аткаруу үчүн атайын курулган; планда (1957-жылы архитектор Л. Коста иштеп чыккан) самолёттун сөлөкөтүн элестетет. «фюзеляжында» – административдик жана коомдук имараттар, «канаттарында» – турак жай кварталдары, «тумшугунда» – үч бурчтуу аянтында улуттук конгресс сарайы, асман мелжиген секретариат, өкмөт жана юстиция сарайлары (архитектор О. Нимейер) жайгашкан. Аянттын тегерегине министрликтин 20 кабаттуу имараты курулган. Шаар Бүткүл дүйнөлүк мурастын тизмесине киргизилген.